تنبت الذكرى على درب ٍ مشيته

من فرح لقياه لـ.. أحزان المواني

شكل ثاني كان حبه من هويته

من هويته كان حبه شكل ثاني

كل ماشتد العتب فيّ ونويته

وردته تنبت على طارف لساني

غاب مدري غابت ايامه وجيته

من خلاف الجرح من بين المحاني

مستحيل انساه لو اقدر نسيته

وان نسيت انسى من النسيان جاني

ياكبر فضله على احساس ٍ سريته

والدقايق مانست فضل الثواني

كيف اعيش العمر ياحلمٍ بنيته

والامل مقتول يابيض الاماني

الفراق المر من عينه قريته

وغداً القاك عن كل الاغاني

بلغوه أنه يجي والبيت بيته

علموه ان كان ماربي هداني

كل ماصوته يناديني لقيته

كل ماصوتي يناديله لقاني

كان ياماكان فاكرني سليته

ماسليته لو سلب غيري مكاني

حب ذات وحب مات وحب ليته

كيف تجمعها بقلبك يا اناني

مين ينصفني من اللي مالقيته

دارت الايام اروح لمين ثاني

** **

- عبدالله بن حديجان