الموضوعات الأكثر
كم راح من عمري وأنا ودي أتوب
ولولا الهوى والنفس كان أمس تايب
عشرين عام أمنِّي النفس بالتوب
لين اكتشفت أني مع الوقت شايب
راحت حياتي بين طالب ومطلوب
ولي خاطرٍ لو طبت ماهو بطايب
وأخاف من يوم به الموت مكتوب
لاحولوا بي بين عوج النصايب
في منزل مظلم عن الناس محجوب
محجوب حتى عن نسيم الهبايب
وصار الكفن يا ناس يغني عن الثوب
وفارقت ربعي والأهل والقرايب
ما عاد فيها جاه وأموال وأسلوب
ولا عاد فيها حب خشم وطلايب
خدعني التسويف وأغرتني دروب
من يامن الدنيا وغدر النوايب
يالله يافارج على كل مكروب
ياواحدٍ بأمرك تهون المصايب
يامن تقلب بين أصابيعك قلوب
خلقتها من بين صلب وترايب
ياغافر لمن جالك وكله ذنوب
عبدٍ ضعيف وجاك تايب ونايب
يارب لو قلبي صخر عندك يذوب
يامن لهيبتك الجبل خر ذايب
أتوب ثم أعود وأعود وأتوب
ماهي عجيبة وأنت رب العجايب
من المهد للّحد ترى الوقت محسوب
ماضاع شي وما بقى شي غايب
يارب مالي غير رحمتك مطلوب
من لي سواك إن جيت يارب تايب
كم راح من عمري وأنا ودي أتوب
ولولا الهوى والنفس كان أمس تايب
** **
- زياد بن حجاب بن نحيت