الراس من كثر الهواجيس عمسان

وانا على البن اليماني مضريه

برية تجلب من جبال خولان

كيف لعطران الشوارب نسويه

تجلب على اللي ماحسب فيه الاثمان

شف النشامى كل ما حل طاريه

البن يحمس يابيض الوجه باتقان

وعن الحرق يامسندي نعتني فيه

ندقه بنجرا يصوت بالأذان

صوته عذاب اللي برى الحال خافيه

مع دلة صفرا من الصنع رسلان

تغدي عماس اللي بعيده هقاويه

تنساق للي له مكانه وله شان

الطيب اللي وافي في مباديه

اللي على الخوه شفوق وهيمان

الصاحب اللي نفتخر به ونغليه

في خايع عله من الصيب رويان

زانت مرابيعه وصدر ضواميه

لاسالت الشعبان والمزن ودان

من وابل بالخير هلت مناشيه

شوف الحيا يغنيك عن كل بنيان

والبر علاج اللي كثيره طواريه

ترفيهنا خوه هل العز والشان

وخوينا كلن تمنا يخاويه

خوينا واف الخصايل كحيلان

لا قلت وينك قال حاضر ولبيه

هذي طراة العمر مبطي الى الان

والعمر مايعرف على ويش تاليه

** **

- الشاعر/ عبدالله بن رجاء العنزي