كما يرفع الله العلم من الأرض بفقد العلماء؛ كذلك يرفع الله الطيب منها بفقد الشرفاء وأهل الطيب ولا ريب.. رحم الله والدي الجليل (الشيخ حميّد بن حامد السالمي)، وأسبغ عليه من شآبيب رحمته وغفرانه..

يالله ياللي عليك المضنكات الدهوم

نرمي عطبها.. وحومتها.. وزلزالها..

ياواحدٍ من نصرته ما بدى به ثلوم

يا مالك الملك.. للدعوات مدهالها..

تكتب لنا جنة الفردوس يومٍ نقوم

يومٍ تجيك العباد تنوء باحمالها..

ياحادي العيس.. لا عديت هاك الرجوم

لا تمشي إلا دروب الطيب وسبالها..

لا تسلك إلا سبيل العز واعط الحزوم

اللي من الجد عزتها.. ومن خالها..

واستنفر اللي زهل للود واحصى العلوم

وامضى حياته على الخوّه ومنوالها..

انهج على نهج ابو صالح رفيع الوسوم

اللي عليه العيون يفيض شلّالها..

اللي عليه القدم فالسبت.. عيت تقوم

والجسم عيّا على الأقدام يشتالها..

نهار.. لا عادك الله يالنهار الجهوم

يومك خذيت المروّة وانتهى فالها..

نهار.. لا عادك الله يانهار الوجوم

يومك تجريت للنقوات تغتالها..

نهار.. لا عادك الله حين طاحت عزوم

خليت نضر الوجوه تشيب من حالها..

أخذت ثومة فؤادي من خيار القروم

القامة اللي جميع الخلق تهتالها..

اللي جبل فالبياض وقبل بيض الهدوم

والكف الأبيض شعاع النور يزهى لها..

الله جمع فيه مرضاته وطيب السلوم

باجمل صفات الصحابة.. وأطيب أقوالها..

الصادق اللي نذر نفسه على الصدق دوم

ما يوم حوّل على الخدعة ومحتالها..

والوافي اللي تشوفه عند وقت اللّزوم

لا حل في لازمه يشفيك بافعالها..

والغالي اللي غلاته تستميل العموم

من يلتقي فيه نفسه دوم يطرى لها..

والسيّد اللي ورى صمته علوم وعلوم

ياتيك علمه بنظره ما يورّالها..

درسٍ مكمّل على الصامت يصل للنجوم

والحاذق اللي يحوف النجم ويطالها..

والراقي اللي رقيّه دون رفع الخشوم

علّاه رب البريّة بأثمن خصالها..

الدين والسمت والأخلاق.. واللي يدوم

ذكر الولي حين مقفاها.. ومقبالها..

ياحادي العيس.. عن درب السفاسيف شوم

شومة حميّد عن الزلّة.. ودلّالها..

خلّك سواته.. كبير النفس سمح القدوم

خلّا الرديّه يسار.. ومن تعنّالها..

ياحادي العيس لا تقبل على الطيب سوم

يوم العرب تقبل السومه وتحلى لها..

دونك حميّد عفيف النفس.. طبّ السقوم

اللي ترفّع عن الدنيا.. ولا جالها..

نهجٍ.. نبي العباد اوصى بفعله لزوم

وسلمٍ.. عليه القبايل ربّت عيالها..

مرحوم ياللي ذكرته بالنهار السَموم

ياطيب ذعذاع روحك يوم يجتالها..

ماكنّه إلا عبير الورد.. وانت امحشوم

مدري عبير الورود يجود بامثالها..

أنت الوفا والمروّه.. وانت كل الحلوم

انا اشهد انك مكيّلها.. ومثقالها..

يا (وارث الطيب) سامحني على كل لوم

واقبل من النفس غفوتها ومقيالها..

وادمح عسى الله يبيحك يالمهاب.. المروم

وأرضى عسى الله ينجّيني من أهوالها..

كنْها سنيني بقربك يابيض الوجه.. يوم

راحت ولا كنّي اتهنيت بوصالها..

ماكنّي اللي ثلاث عقود لازمك توم

أعرف خفايا مواجيبك ومعدالها..

وأصبح على ريحة أنفاسك وطيب النسوم

وأمسي على الجزل فابياتك وموّالها..

واليوم أنا عقب فقدك مثل جاهل يعوم

أبوه روّح.. وهو بحلان في جالها..

محدن درابه.. وموج البحر ظالم غشوم

ياوجد روحي على حاله.. وتفصالها..

والله يلولاك بعد الله فلالي هموم

أنت أكبر الهمّ في الحلّه وترحالها..

رضاك همّي قبل موتك وعقب الرسوم

والله يغيث الكبود ويجبر أحوالها..

(على يديني) توسدت الوداع امحتوم

لو في يدي جيت دونك وانت تبرى لها..

واعطيك من عمري المقبل وطيب التخوم

ياكبر حظ الخلايق يوم تبقى لها..

وياطيب دارٍ بها مثل الرحيق امختوم

وابرك نهارٍ به اسمك يعبق خلالها..

ياللي تقوم اللّيال.. ولا ضحى الوقت صوم

ياعلّ روحك على الفردوس منزالها..

وابشر بحظوة كرامٍ عند ربٍ رحوم

اللي بحبله عباده توثق حبالها..

في صحبةٍ قاد صفوتها نبي امعصوم

عليه منا صلاةٍ صافي زلالها..

ياطيّب الذكر.. ودعتك وفيني سهوم

والملتقى.. عند عاقدها وحلّالها..

والله.. يابوي.. ما أصخى بك وناري ضروم

لكنها سنة المولى.. ودسمالها..

ياحادي العيس وإن ضاقت عليك العلوم

نوّخ ركابك على الطيبه.. وجمّالها..

وانصحك لا تلفت الهامه لبعض الرخوم

عز الله أن الرخوم اليوم يرثى لها..

في حفظ منهو عيونه لا حشا ما تنوم

إلزم على وافي السيرة.. وهيّالها..

وانهج على نهج أبو صالح رفيع الوسوم

اللي عليه العيون يفيض شلّالها..

** **

شعر/ عادل بن حميّد السالمي - (عز الرهيد)