عسى القاع تغرورق بدمع السما وتفوع

ولاعاد يوحى للعطش والمحل نبره

تهل السما رحمه ولو هي تهل دموع

ولا اصدق من الرحمه مع الدمع والعبره

بغى الوقت يذبح هالسنه جرة الجربوع

وعود العبل دقه يروع عقب جبره

وراع البل وراع الغنم كلهم مفجوع

وكل تهاوى طول باله على صبره

عقب جيته في كل فرصه ومعه ربوع

هجرهم وياسه دون شوف الدبش سبره

وفزع للجميع الخالق الوامر المسموع

وثوب السحاب انطر بالخير من كبره

لنا خمسة ايام تتابع ديم ورجوع

عسى دوم يامنعم على العبد تختبره

وجانا بمر منشيه عجل السحاب فزوع

بدبرة كريمٍ مانبي غيرها دبره

وجا للسما قبة سحاب بدون مزوع

ولا اومى على الارض وضرب ثوعت غبره

نبي شوفة وحوش الخلا خنس ورتوع

وحلال الشواوي يرتوي بالشحم هبره

يجي العشب من طوله وهو هدف وركوع

ويشمخ مثل عشب لحقناه ونخبره

تفتق كموم الارض من كل فاني نوع

وتخضر الانفس قبل الارض وتجي عبره

ويجي للفقع ردم ويجي له كوم وجموع

بياضه تقول اقط من بعيد من زبره

وذكر المحل يفنى ويدفن بضرف اسبوع

ولاعاد يعرف لارسومه ولاقبره

** **

- فهد السياري