الموضوعات الأكثر
المكرم المشرف على صفحة الأدب الشعبي في صحيفة «الجزيرة»
السلام عليكم ورحمة الله وبركاته وبعد:
فقد تم تداول إحدى قصائدي المعروفة في وسائل التواصل الاجتماعي ونسبها البعض لغيري علما بأن القصيدة لي وأنا مسؤول كامل المسؤولية عن قولي هذا ولدي من أدلة الإثبات على ما ذكرته ما يحسم النقاش حول القصيدة ولثقتي بحيادية صحيفة الجزيرة الرائدة ومهنيتها آمل نشرها في صفحتكم المتميزة مرفقا لكم معها اسمي الرباعي وصورتي الشخصية حيث سبق أن نشرتها في بعض وسائل التواصل الاجتماعي وتم حذف اسمي منها والعبث بها، والله يحفظكم.
ان كان مالك ماقف مع جماعتك
ترى السوالف في المجالس فشيله
ولا صار بشتك ما يلحف قرابتك
لفه وخله مع عباة الحليله
الناس ما تنظر لوجهك وصورتك
لا صار ثقل الحمل ماترتكي له
وان كان ماتحرق على النار دلتك
نوخ ذلولك في الذرى والمسيله
ترى المراجل وانت نايم تعدتك
وراحت لمن حملك وحمله يشيله
وان كان فعلك ما ينومس قبيلتك
جعلك فدى اللي صار فخر القبيله
ترى الجماعة في اللوازيم حربتك
حذراك من فعل القلوب الهبيله
وترى القبيله بعد ربك مضلتك
في ضفها كنك براس الطويله
من دونها يمدي الذيابه تعشتك
لاتحسب انك صرت حامي الدبيله
واحذر مقضك لايعود للحيتك
واحفظ كلامك لايجي فيه عيله
ودليل عقلك لا تكلمت هرجتك
مثل السراج ومثل نور الفتيله
والناس ما تغفر مع الوقت غلطتك
ارفع مقامك عن دروب الرذيله
ترى لسانك هو علامة كرامتك
ومن يخطي الجزله يصيد الهزيله
واحفظ فروض الدين فيها معزتك
والزم كتاب الله وسنة خليله
وارفع عيونك عن حجى بيت جارتك
ترى قصير البيت كله دخيله
ومحرم قصير البيت من ضمن أمانتك
فيها حديث ثابت مع دليله
واعرف حقوق اللي من الثدي غذتك
من قبل ماتردم عليك النثيله
امك تراها من مفاتيح جنتك
حافظ على المفتاح بأية وسيله
كم ليلة تسهر على شان راحتك
عسى جزاها في الجنان الظليله
وخدمتك للوالد علامة رجولتك
لامات ما تلقى مكانه بديله
حتى ايش لوتنثر على القبر دمعتك
ما دام كفك في حياته بخيله
وعلى خوانك لا تمارس شجاعتك
اخوك عضدك ماتحصل مثيله
وخلك شقردي لا لفوا لك نسابتك
اللي عطوك اعنان بنت الكحيله
كثر تراحيبك وعلق ذبيحتك
واحذر تصير مع النسابه هضيله
وبالضيف رحب حين ينزل بساحتك
وكرامته واجب عليك وفضيله
اعطيتك الموجز وعلمي سلامتك
يكفيك عن فلم الف ليله وليله
وترى المنايا يم غيرك تخطتك
وموعدك معها بعد مده قليله
هذي نصيحه وأنت راجع مسيرتك
واعرف طريقك لايجي فيه ميله
واحذر عدو في طريقك يباغتك
وبرق يجنب عنك لا تستخيله
ويا الله طلبتك في الخواتيم رحمتك
ما غيرك احد كل كرب يزيله
** **
- مناحي بن عبدالله السدر الحمادي العتيبي