الموضوعات الأكثر
يقولون ما للعبد بدٍ عن المقسوم
وأنا أقول صح ويقنع العبد مقسومه
عسى الله يعين اللي توافد عليه هموم
همومٍ تخلي طبلة الراس منجومه
ترى والله إنه مايكدّر عليك النوم
سوى كلمةٍ من بعض الأصحاب مسمومه
إلى جت من الغالين والاّ الرخوم رخوم
ولا أمحق من الغالي إليا شانت علومه
ضعاف الروابع تبتلس والقروم تشوم
ولا هيب لاشامت من الشين مليومه
ولا أزين من القاع الخلا والوجيه سلوم
ولا رفقةٍ مع طول الأيام ملغومه
ولا ألذ من رفقة شريفٍ من أقصى القوم
يبادلك فعل الطيب معناه وسلومه
ولا شفت في جو الصداقه غبش وغيوم
عطيت الدروب اللي مع الأرض مرسومه
ولا مثل عز النفس لو مامعك مطعوم
عن أهل الشماته خل الأسرار مكتومه
معي لو سمحت شوي عقبٍ عَدَاك اللوم
أبعطيك عن بعض الرياجيل معلومه
ترى اللّاش لو وقّف معك في حياته يوم
تشوف الردى متبيّنٍ فيه من يومه
وأنا أقول لو إن في وجيه الرخوم وسوم
عرفنا نميّز قيمة النذل بوسومه
علشان نجلس مع رجال الوفاء ونقوم
ونبعد من اللي عند الأجواد مذمومه
أنا أسمع مع أهل التجربة بالحياة علوم
بعضها صحيح وبعض الأخبار موهومه
يقولون وكر الحر مايعتليه البوم
أنا شوف عيني وكر حرٍ تحت بومه
** **
راجح بن سالم العجمي -رحمه الله-