لا تجاهلني وأنا قدام عينك

مثل وجه البدر في ليل المهالك

ولا تَعَقْد حجاجك وتقْطب جبينك

ولا تناسى كلمةٍ قد قلتها لك

والله إن تندم على فعلة يدينك

ثم تصفق كفك اليمنى شمالك

ولا تحسب إنّي بأدوّر عنك وينك؟

لا تقفّتك الحسايف شان حالك!

عادتي لا شمت عن زينك وشينك

ما التفت لخلاف لو الدرب حالك

والرياح العاتية بيني وبينك

عقب قلبٍ بالوفاء والحب شالك

جف نبعٍ كان يسري في وتينك

وذبل غصنٍ ما رجاه الا وصالك

ولو دفعت العمر كفّارة يمينك

ما وراها إلاّ انكسارك وانخذالك

وكل جرحٍ جاد به كفّك يدينك

لا تحسب الدرب لا عوّدت سالك

بدّل الله عقب صدّك جنتينك

واندثر بستانك ووارف ظلالك

رح عسى ربي على الدنيا يعينك

نال منّي الحظ وانت العدل نالك

حكمةٍ خذها تعدّل لك سنينك

يمكن يطيّب بها الرحمن فالك

نيّتك خَلها على العليا تعينك

وعن ظلايم خلق ربي لا يسالك

وكل غاليٍ يسكن بقلبك رهينك

لا تسوم برخص مخلوقٍ وفاء لك

** **

شواهق نجد - هيلة القحطاني