الموضوعات الأكثر
يا جبال طويق قولي وش وراك
وسطري التاريخ في صفحة سماك
وحدثينا عن حياة وعن هلاك
وعن شموخ العز ينبت في ثراك
* * *
في وطنا كل شي ابتدا
من نزل ادم إلى يوم الندا
الخبر فيها وهي المبتدا
ويكفي رب البيت بالكعبة اصطفاك
* * *
كم حضارة في بلادي أشهدت
من شماله لجنوبه ما خلت
لين لاح النور من غربه وبدت
شمس دين الله تشرق من ضياك
* * *
وحدثينا عن صراعات الأمم
والقبايل بينها ثارات ودم
والمرض والخوف وأحزان وألم
وعن سنين عجاف زادوا في شقاك
* * *
لين منَّ الله علينا بالمطر
وانبتت صحرا الضما نفل وزهر
هذا ابوتركي على العليا ظهر
واستعاد الملك وبعمره فداك
* * *
بالعدل والسيف خاض المعركة
والطموح اللي صعيب ندركه
وحّد الدولة وأسس مملكة
الله اللي ملكك والله عطاك
* * *
وقمنا للعرضة وغنى كل طير
من جبل دخان لحدود الزبير
نحمد اللي عزنا بكل خير
وسر يا أبوتركي شعبك من وراك
* * *
واستمر الحكم في نسله الكريم
عهد أبوخيرين وفصيلنا العظيم
ثم خالد والفهد خير عميم
وأبومتعب عالي الهمة كفاك
* * *
وابتدت رؤية جديدة للبلد
قادها سلمان يا وجه السعد
ولولي العهد جددنا العهد
عشت يا محمد ثابت في خطاك
* * *
يا ملكنا يا نظر عين الشعب
يا سليل المجد يا عز العرب
مخلص النية وربي لك وهب
شعب يحبك ما عمره عصاك
* * *
مقبلين وسامعين وطايعين
للملك سلمان حنا مبايعين
ولأبو سلمان صافحنا بيمين
منشط ومكره بيعتنا معاك
* * *
حنا حرب للي يشعل نارها
وحنا سلم لا رمت أوزارها
وحنا خير للوطن ولجارها
حنا حنا وما مثلنا اعتلاك
* * *
ما نقول إلا إذا كنا نطول
ما نعرف الذل وانصاف الحلول
الله اللي عزنا بدين ورسول
والله اللي من على عرشه حماك
* * *
فوق هام السحب نبني عزنا
بالطموح اللي بدا بسيف وقنا
يا محمد رؤيتك هي حلمنا
يا سمو المجد ما نرضى سواك
** **
- سعود بن ناصر الحمدان
Salhamdan@hotmail.com