مرثية في الدكتور ناصر البراق - رحمه الله

خطبٍ جلل والفكر شارد ومذهول

وهجوس شعري واجماتٍ مغاليل

يالابتي كني من الفقد مشلول

والليل عقب القرم يامطول الليل

من عقب ناصر كنه الطرف مسمول

أقوم وأقعد لا عزا لي ولا حيل

واليا نصيت الربع يلجمني الهول

وكلٍ دموعه من مصابه هماليل

وأكبر من التعبير وأبلغ من القول

وسم الفجيعة في وجيه الرياجيل

وأنا مسجم كلمتي بس لا حوّْل

وزفراتي الثكلى تكفي عن القيل

عزاه! معقول؟ انتحى الذرب! معقول

يارب عفوك كان في منطقي ميل

ألوذ بك وأطلبك مهطع ومكبول

رحماك يامنشي صدوق المخاييل

ترحم فقيدٍ لي ثوى العصر مقبول

عندك بتكبير العرب والتهاليل

حشدٍ يشيع صارمٍ عاش مسلول

للند وألا بالندى كنه النيل

ركنٍ عتيبيٍ على الجود مجبول

تقصر عن فعوله زحول الرياجيل

يامقصر الدنيا ويا مطول الحول

أقفى ولا كنا سمرنا ولا ليل

وكم منزلٍ من قبلنا كان منزول

ومن عقبنا ينزل وحنا مجاهيل

مير العوض عمن مضى العصر محمول

تداحمت لأجله متون الرياجيل

قلت العوض عقبه وأنا صادق القول

شم العيال الفالحين المشاكيل

** **

- عبدالله بن متعب السميَّح