يا نجود انا مانيب زعلان يانجود

مير الزمن زعّل وسيع البنايد

ايام اقول اني من الناس محسود

وايام اعاف النوم فوق الوسايد

من لا يعرف الهم مايكسب الفود

ومن لا يقود الراي ماهوب قايد

ما كل من غنّى له السمع مشدود

ولا كل من يقصد جزيل القصايد

والحمد للي حطّها سْهود و مْهود

وكلّن يقول انه زعيم البدايد

دون الردي واهْل الردى الباب مسدود

فرقاه يوم العيد واكْبر فوايد

واللي يشيل النفس ماهوب محمود

نقصٍ على البيدا ولاهوب زايد

ولا تامن الدنيا ولا تامن السود

وخلّك عزيز النفس وقت الشدايد

والجود فهْل الجود شاهد ومشهود

والاّ على اهل البخل صعبٍ وكايد

ولا ترجي من السيد والسيد مسيود

تصبح عزيز النفس للنفس سايد

خل الرجا في والي الكون معقود

والعبد مخلوقٍ وللرب عايد

ولاينهزم قرمٍ على الطيب معهود

يرقى بها روس النوايف عوايد

** **

- حشر بن عبدالمحسن بن حميد