ما بخيل إلا بخيل الجاه والدنيا تجارب

ومن قصر جاهه عن الأجواد قاصرةٍ يدينه

ومن ضحك في وجهك وجامل لتحقيق المأرب

ما هو مورّدك عد ولا معشيك السمينة

جربه والتجربة برهان في سلم المحارب

قبل لا تبدي خفاه وقبل تعطيه الثمينة

والشهد صنع النحل والسم بأذناب العقارب

والصقر يبطش بمخلابه وفعله ما يدينه

احسب حساب الثعالب.. واحترس من فار مارب

خل لك طمرة حصان وخل لك وقفة رزينه

ولو عصاك تسوقها لأطرف سبب في كل غارب

ضاعت أيامك ورى طرد اقرد العالم رهينة

اختر أخصامك ليا خاصمت واعرف كل شارب

الخصوم أنواع مثل الصيد والبندق حصينة

واحترم عقل البعيد وصون عثرات الأقارب

وابن عمك لا تساعد في انكساره شامتينه

وإن سألك اللي يدوّر غلطته والوضع خارب

سوق له من خمسك اللي يجعل أيامه حزينة

والبحر موجه غزير وما تجاريه القوارب

والسفن تدعى الإبل والباخرة تعرف سفينة

والعمر رحلة مسافر والبخت عنوان هارب

وين ما حطت رحاله قال يا جور المدينة

وعن شموخك لا تنازل لو على دقم الشوارب

خل لك وثبات ذيب وفي مطير الصقر عينه

** **

- نايف المطيري