جتني تقول اليوم ماشين لجنيف

نقضي إجازتنا بأحلى المصايف

الديرة اللي جوها يطرب الكيف

فيها المطر والثلج روس النوايف

وفيها الطبيعة يعكس ألوانها الطيف

تسر عين اللي من البيد عايف

قلت العفو يا سيد كل المواليف

في هرجك اللي جاء من أحلى شفايف

المملكة داري ولي ألف تشريف

ما مثلها لو قلت كل الوصايف

دار السعود اللي حموها على السيف

ساد الأمن فيها ولا فيه خايف

فيها بيوت الله كلٌ لها ضيف

من كل حدب وصوب صارت ولايف

نعمة أمان وأمن ما مثلها شيف

حست بها حتى العيون الكفايف

هذا جوابي يوم قلتي لي جنيف

والحمد لله عندنا أحلى المصايف

** **

- صالح بن عبدالله القحطاني