ولا جابك من الماضي حنين ولا يردك شوق

أجل بالله من بعد الغياب سنين وش جابك؟

ولا مريت في بالك سحاب ينهمر من فوق

يرجع ممحل العمر القديم ويرعش أهدابك

ولا ساعي حضر مرة يلامس لهفة الصندوق

كأن الليل مسترخص غلاك ويعشق غيابك

توجادي على وصلك توجاد الملك فاروق

على كرسي حوالينه جنود وخيلهم دايك

أنا ما أقدر على الوصل الهزيل وخاطري مخنوق

وأصابعنا مع الغيبة نست وشلون تتشابك

عطيتك دمعة تخفى ولا تظهر على مخلوق

وسترت الحزن في صدر تحداني وهلا بك

على مهل اللقاء باقي زمان بغيبتك مسروق

وبقايا عطري المجفي زمن تلقاه با ثيابك

كثر ما خابت الهقوة سنين وما تحب تروق

أنا خسران لو إنه طموحي أكسب اعجابك

أنا آسف على عسف الشعور وقسوة المنطوق

يد التلويح لا ترقب صداها يطرق أبوابك

ترى أحبابك على موعد.. وأنا ماني بناقص ذوق

عسى الله يستر جروح الزمان ويحفظ أحبابك

** **

- عبدالملك الخربوش