الموضوعات الأكثر
بيّض الله وجه منظومة «نزاهة»
واصلينٍ بالعزم نجم الثريّا
كاسبين المجد.. راعين الوجاهة
عارفينٍ بالفعل معنى الحميّا
بأمر سلمان اقتلعنا (كلّ عاهة)
عشت سلمان الحزم سمح المحيّا
وقادها محمد.. وحلّينا المتاهة
قال: هيّا.. وْكلّ شعبه قال: هيّا
ما شكينا مْن الزمن لوعة وآهة
همّةٍ باقصى السما.. ما هي هنيّا
لو نغمّض عين.. للأخرى انتباهة
ما نْغَفَل وعْروقنا بالدمّ ريّا
يوم بعض الخلق في عقله سفاهة
وراعي الملحا(1) ظلم راع الحويّا (2)
جاك زيزومٍ مسح أمّ الشراهة
واللي يبغاه المعادي ما تهيّا
ودّهم نهب الوطن خُبث وْبلاهة
ويا حلاة السيف الاملح يوم عيّى!
وكم (عليلٍ) ودّه (بْ فترة نقاهة)
قال: نبغى في بلدنا هالسويّا
مثل ابن سلمان.. فكره والنزاهة
ودّنا لو يوم شرّفنا.. وحيّى
الوطن عشقٍ نعرفه بالبداهة
دوحةٍ فيها على العزّ نْتفيّا
وكلّ خاين لو لفانا وْجاب جاهة
ما نبي له جاهةٍ دامه كذيّا
الخيانة ما نفسِّرها: فكاهة
والصقر يفرق عن طْيور الحديّا
وكلّ جرح يْهون واعتبره تفاهة
غير طعنات القرايب بالقفيّا
وقِدْها يا محمد بعزمك والنباهة
وارفع الراية على رجم الثريّا
... ... ... ...
(1) راعي الملحا: صاحب الناقة (كناية عن القوي).
(2) راع الحوَيّا: صاحب الماعز (كناية عن الضعيف).
** **
- فيصل الصاعدي