كم حرف يبغي في قصيدي اشيله

وكم حرف يسمى لا نظمته وشليت

وكم حرف كمل بيت واشعل فتيله

وكم حرف يطرب لا نظمته وغنّيت

وكم حرف لا يبغى ولا فيه حيله

وكم حرف جريته وتعّب وخليت

وكم حرف صوت العود يعزف عليله

وكم حرف يبكي الناي لـ ارخى وشديت

وكم حرف في شعري ولا آبي بديله

وكم حرف لا شفتك ذكرته وعليت

انت الحروف الفاردات الجميله

وانت القصيد اللي بديته ولا انهيت ..

وانت النغم والعازفات الكميله

وانت الحضور وآه لاجيت وابديت

وانت بعد عمري وانتي خليله

وانت لك الدنيا واعلنت ما اخفيت

لك باختصار الوجد يبقى طويله

ولك فايق حروفك ولك ما تمنيت

ولك ما بقيتي وما عرفت الاصيله

ولك كل وصف انت لغيرك وش ابقيت؟

** **

- د. ناصر بن كدسه