والله انك لو دريت بنار شوقي وانشغالي

كل ما خذني لك الطاري على كف الحنين

إن تغلا.. لا تمر ولا ترد.. ولا تبالي

تلبس ثياب الغرور وتعقد احلا حاجبين

ليل في لقياك نار وليل في فرقاك صالي

راح عمري يوم احسبه معك بين الليلتين

إنت يالغالي يميني مادرت باسمك شمالي

وأول أشواقي شمالي مادرت عنها اليمين

كان لاشفتك نسيت اني جريح وشفت حالي

والله إني يوم اشوفك كني اغنى العالمين

حافظ لك كلمتين وقبل اجيك وهن في بالي

ويوم شفت عيونك الخدرة نسيت الكلمتين

لو يقولون الذهب واللول والالماس غالي

أشهد انك فارق وبدال غالي.. غاليين

** **

- هدب