هاك الجروح وجرّها بالربابه

ياعازفٍ يبدع على جرّة القوس

جروح من عض الشفايا بنابه

يدرى خفايا النفس عن كل جاسوس

ما غيرك اللّي بالعرب قد درابه

وبخافي احساسه ولا.. ليه محسوس

ولا قد قرا شعره سواك وكتابه

واللي مابين سطوره سنين مدسوس

أسري بصوتك مع جريحٍ سرابه

جرحه عن العالم وهم باقي جلوس

يتلا بروق الحزن.. حزن السحابه

تروي له هجوسٍ. وتضمي له هجوس

تايه خلاوي منعزل به عذابه

مانوس بالوحده ولاهوب مانوس

أقنب بصوتك مع قنيب الذيابه

مابين مسحوبٍ ومابين منكوس

يمكن على حسّك يعود لصوابه

ويصحى من أوهامٍ بها كان مغموس

ويمكن على حسّك وحسّ الربابه

تبرا به جروحٍ. من القوس للقوس

** **

- السبيعية