الله من همٍ بقلبي أزايمه

أشكي على الخلاق ربي ظلايمه

ضاقت فجوج الأرض وأظلم بي الفضا

والحيل مما فيّ خارت عزايمه

آيام عمري كنها حزة الشفق

وماعاد منها حان موعد صرايمه

دنياي ما دانت لقلبي وعزرت

عزاه ياقلبٍ عنا الوقت ضايمه

ماعاد لي فيها رغايب ومشتهى

من عقب هوماته وقوة شكايمه

صادمت بالدنيا الهوايل بعينها

والقلب مما جاه يعلن هزايمه

ما زل في عمره ولا ذل أو خضع

ومما يعيب النفس بالنفس شايمه

واصبر وأنا آشوف العوج في فعولهم

عسى إنها تبقى العلاقات دايمه

وأغض طرفي كلما بان لي خلل

والنفس عما ينزل القدر صايمه

والله يسوق لكل نفس برزقها

حتى الطيور اللي بالأرجاء حايمه

فلا عاد تحسد والله الواهب الغني

الواسع المعبود ماكثر نعايمه

ولا تحمل الأحقاد للخلق كلهم

الحقد نار وسط جوفك هشايمه

ولا تنكر المعروف ليا منْه مد لك

وإن زان لك وقتك تغانم نعايمه

وإن بار فان الصبر مفتاح للفرج

وسماك ماهي كل الاوقات غايمه

** **

- شواهق نجد