يوم نادى بحيّا للفلاح

فرّت الروح من طيب الندَا

والسماء غايمه والبرق لاح

والهوى عقب ماعجّل هَدَا

أقبل الغيم متزيّن وطاح

طاح من طِيب ماهو من ردا

ياصباح المطر يااجمل صباح

كل شيءٍ على خدّه ندا

هلّ سيل الوسامي واستراح

فالمطامن عقب طول إمْعَدَا

والجفاف اختفى والعشب فاح

وكل طيرٍ على غصنه شدا

والمشاعر تطير ابلا جناح

والطواري لها صوت وصدى

وين طاريك ياطير الفلاح

يابعيد المعشّى والمدى

أدري إنك تبي صيهد رماح

كان قلت إيه ماقلنا بِدا

الخوي مانعرّضه الصياح

ندري إنه ماهو ضايع جِدا

عقبها عاد تسلم والسماح

إسمع الراي يومنّه قدا

بدو ونحب تجديد المراح

بالشمال الخبر والمبتدا

الشمال أرضه الصدر البَرَاح

ماتشوف أهله فيه إسعدا

يعطي الصدر بهجه وانشراح

دونه أتعابنا ماهي سِدى

الفياض إكتست زين الوشاح

وأَهَل البل اتغني واتحَدَا

مد شوفك مع الأرض البياح

لين نصبح مع الحد إحددا

إجتماعٍ على عز وصحاح

في كرامة عشاء والاّ غَدَا

وإن سمرنا ونقّضت الجراح

منك صوت الهجيني ماهَدا

عد نفسك على العِد القراح

واحفظه وازعج الصوت وادا

وقتنا صعب وايامه شحاح

والفرص كم وكم منها غَدى

نبهج العمر واللّي راح راح

جعل ماراح للمقبل فِدَا

** **

- ضيدان المريخي