الموضوعات الأكثر
ودّعت الساحة الشعبية قبل أيام الشاعر راجح بن سالم العجمي -رحمه الله-
الذي اتصفت قصائده بالجزالة وقوة المعنى والمخزون اللغوي، ومن أبرز أغراض الشعر التي تطرّق اليها
الشعر الوطني:
يالله احفظ قائد المملكه وادحر اعداه
الزعيم اللي ثقال الحمول يشيلها
ومنها:
الشريعه قايمه في حمى الله ثم حماه
وخادمٍ مكه وطيبه ومن يلفي لها
ويالله احفظ نائبه ثم حقّق له مناه
عضد أبوه ليا طفح في المواقف كيلها
داهية عصره ليا عدّدوا روس الدهاه
كل مامرّت قضيّه فهم تحليلها
ومنها:
وحن سعوديين نمضي بحكمه وانتباه
ولا تزعزعنا السفاهه ولا نصغي لها
كل واحد ذَا كلامه وهذا مبتغاه
السعوديه بلادي وأنا كلّي لها
ومن قصيدة وطنية أخرى يقول عن مكانة المملكة العربية السعودية:
أفضل بقاع الأرض في نص الآيات
مكه وطيبه ثم مسرى نبيّه
إنّا هل الشيمات واهل المروّات
جيراننا مايشتكون الأذيّه
ومن قصيدة وطنية أخرى يقول:
السعوديه بلادي وانا فيها ربيت
أحترمها واغلي اللي بعد يغلونها
وإن سمعت أحدٍ يبي ينتقصها مارضيت
أعترض وأقحم اعداها واسد عيونها
قلعة التوحيد للأمن والآمان بيت
يهلك الله زمرةٍ تستبيح حصونها
أمنها بأموت لابعت فيه ولا شريت
عيب كيف أنعم بخيراتها وآخونها
ومن قصائده في النصيحه والحث على مكارم الأخلاق في اختيار الصديق يقول:
يالله ارزقني رفيقٍ على الزلّه صبور
كل ماجاته خطيّه طمر من فوقها
لو يطول الوقت بيني وبينه مايبور
يحتمي عرضي وأنا رفقته ماابوقها
ماتسمّع هرج حاسد ودقّات امعثور
والعلوم الطيّبه ناهجٍ طاروقها
والردي مهما يجامل معك فرقاه نور
واعرف انه حيّةٍ سمّها في شدوقها
كما أن قصيدته الأخيرة تأثيرها بالغ لما احتوت عليه من معان رفيعة المضامين كوصيّه
لأبنائه قبل وفاته -رحمه الله-:
يا بوك يا سالم تدانت إخطايه
وحسّيت بآثار المرض في قدومي
وأفهم وأعرف إن كلشٍ له نهايه
مافيه شيءٍ غير ربي يدومي
يوم الشباب وصحّتي في البدايه
من فضل ربي ماتردّت اعزومي
في دبرة الله وأتحرّى سرايه
وأدري مانيب مغادرٍ قبل يومي
وأنا بشر ومعرّضٍ للغوايه
مانيب عن فعل الخطأ بمعصومي
ولا عاد لي في باقي العمر غايه
إلا رضى الرب الغفور الرحومي
أرجوه يرحمني ويغفر خطايه
لاقلّت الحيله وضاعت علومي
وأبغيك تسمع من كلامي وصايه
أفطن لها وأعقد عليها الكمومي
اطلب من الرب الكريم الهدايه
وبلّغ اخوانك بالنصيحه عمومي
الدين الأول بإهتمام وعنايه
ورجلٍ بليّا دين شبه امعدومي
وابنوا لكم في قمّة المجد رايه
وتمسّكوا في طيّبات السلومي
ومن بينكم لاينقلون الوشايه
الحاقدين الحاسدين الرخومي
وترى اختلاف الراي شر وجنايه
ويثلم ويمنع صفكم لايقومي
وترى اتفاق الراي عز وحمايه
وحرزٍ مكينٍ في وجوه الرخومي
** **
- عبدالرحمن أباالجيش