يا طير شاق العين طلعك ورفّك

تسبح فضا وتعانق الجدي وسهيل

اهبد مجرات المعالي بكفك

واضرب على الماضي صليب المقابيل

حتى غيوم الجاذبيه تضفك

عن كل ما يدني من العيب والميل

مكارم الاخلاق عاشت بضفك

لا تلتفت للي نصب لك محابيل

يا مخايل العليا وشوفك يلفك

عنها ولو حايلتها بالدرابيل

نفسك على هوم المعالي تهفك

ولا لك على الطولات حيله ولا حيل

في مركب الاوهام حلمك يزفك

صيفيةٍ مامن ورى رشها سيل

ركزت عن درب الرياجيل خفك

يا زارع الغلطه جنيت المحاصيل

اقفيت وارياح المكابر تدفك

وتبي تشوف المِيل في خطوة الميل

رتبّت من زيف الخيالات رفك

وبنيت مفهومك على القال والقيل

لو وقّفت رغبات ظنك بصفّك

بكره تبين الشمس وتفرّق الليل

قبل تدين الناس فتش ملفك

تلقى به الموجز وكل التفاصيل

ميزان عدلك شاف ثقلي وخفك

لكن عليك الويل يا مطفف الكيل

تزعم ملايكة السلامه تحفك

وإنك عن الطيحه بعيد المناويل

لو ابهجت لك بيض الأيام شفّك

سود الليالي بالحوادث محاميل

** **

- نهار بن ممدوح