عل مزنٍ من القبله يسوقي

فوق كل الوطن يرخي مْزونه

لين يروي شْعابه والعروقي

لين حوّل حصا الضلع وركونه

واكتست خدّها عشبٍ يشوقي

وكل روضٍ يفوح ابزين لونه

دارنا اللّي على العليا سبوقي

سابقٍ مجدها ما يلحقونه

عزّها اللي بدا مثل الشروقي

مع زعيمٍ شعوبه يتبعونه

وانتهض للوطن حرٍّ صدوقي

الْبعيد الهدف تنظر عْيونه

همّته فوق هام السحب فوقي

رايته فالسما والنجم دونه

عاد ملكه وعاد الْهم حقوقي

واجتمع شمل شعبٍ يرتجونه

وحْفظوا عهده ارجالٍ تفوقي

شعبهم للحضاره ينقلونه

والولا في شعوبٍ ماتبوقي

للملك كل عام يجدّدونه

ولولي العهد صعب الطروقي

عهدهم فالْمواقف يكتبونه

** **

- حشر بن عبدالمحسن ابن حميد