ساحل أيامي ومرسى سنيني وتعبي

من يقول إن المشاعر تجف أقلامها

ما تخونك لهجة شعور قلب اليعربي

كل ما تكبر سنينه تزيد أحلامها

ما تعلمت القطاعه ولا هي مذهبي

خل عنك إن المشاعر بيدك زمامها

الغلا في نبض شريان قلبي حل بي

قبل لا تقسى عليّ العرب بأحكامها

اذكر ان قلبي مشى لك وأنا كنت أحبي

وأنت قبل سنين عمرك يحل فطامها

يعني انت من أول العمر سابيني سبي

لاعبٍ بأشواق قلبي من أول عامها

واذكرك من يوم توك مدلل ومخبي

أتنفس من هوى عشرتك وأنسامها

يوم كنت تردّد أنشودة أمي وأبي

قبل تخفي طلّة البدر تحت لثامها

يوم أهلك يدلعونك بقولة ياضبي

انت خابر ويش سويت فيّ أيامها

كيف ماتذكر ظما الشوق في كف طلبي

والحروف النرجسيه وصوت هيامها

والعطش يلفح بصدري وشوفك مشربي

والدروب تطول دونك وأحث أقدامها

يوم أطق أبواب قلبك حياوي وأجنبي

كم تثنّت وردة الحب فوق ابهامها

وأتحرّى في دروبك ولا ألقى مطلبي

ما يجيني من عيونك ياكود سهامها

يا حبيبي دوك كلّي وقل لي وش تبي

رتّب أشواقي مثل ماتبي هندامها

وإن هرج لك حاسد القول قلّه ياغبي

شفني أعالج جروح الهواء وأسقامها

من كثر ماتل قلبه وهو توّه صبي

ما بقى بضلوع قلبه ياكود حطامها

** **

- ضيدان المريخي