القصيدة والأغنية ثنائي ثابت في تاريخ (الشعر والفن) وهذه زاوية نُقَدِّم لأحبتنا ومتابعينا -من خلالها- استجابة وتفاعلًا مع الرسائل التي ترد إلينا أجمل القصائد التي قدمتها أعذب الأصوات.. وفي هذا العدد نقدم نصًا للشاعر رشيد الدهام بصوت الفنان خالد عبدالرحمن:

تعالي نسكت أحسن من كلامٍ تاليته جروح

هلا بالصمت دام الصمت ما يجرح مشاعرنا

أنا وإنتي وطول الصمت والدمعة وكثر البوح

وليلٍ ما بقى به حيل ينهانا ويأمرنا

بكى ما كنّه اللي كان يغرينا فرح ومزوح

سكت ما كنه اللي كان ملهمنا وشاعرنا

توحّي تسمعين الليل ما ادري وش بلاه ينوح

على ضحكاتنا والاّ على كسرة خواطرنا

إذا يبكي من الفرحه علينا علّميه يروح

وإذا يبكي حزن تكفين قولي له يسامرنا

ويجبر خاطرٍ قامت هواجيسه تجي وتروح

يشوف الحال ويكفّ السؤال اللّي محيّرنا

صحيح إناّ صبرنا وإعتبرنا صبرنا مصلوح

ولكن مابقى شيءٍ بعد هذا يصبّرنا

دخيل العاتق اللي له ورى ليل الجديله ضوح

وفِي جاه الشفاه اللّي بنسمتها تعطرّنا

وفي وجه العيون اللي بقى للدمع فيها روح

لأجل خاطر ليالينا وماضينا وحاضرنا

تعالي نسكت أحسن من كلامٍ تاليته جروح

هلا بالصمت دام الصمت مايجرح مشاعرنا