أشياء كثيرة من الأحباب تزعلني

وأشياء كثيرة من الأحباب تبقالي

يا صاحبي منك حاول لا تمللّني

أنا معي ناس واجد ماني لحالي

في مثل ما أعاملك لازم تعاملني

مادام ما أنت العزيز وما أنته الغالي

ماني بحاجة خويٍ لي يجاملني

أحسن بلا الخوّه اللي مالها تالي

من كثر ما أنته عن الأحوال تسألني

صدقتك إنك تهمك سيرة أحوالي

ولا تحسب إن الخسارة شيء يذهلني

لو راح بالبورصة ما أملك من أموالي

أعتى رياح المصايب ما تزلزلني

كم جالت الريح في أرضي وبجبالي

ما يمدي الهم والغربال يقتلني

يا خوي أنا أكبر من همومي وغربالي

ولا يمدي أعداي والعذال تشغلني

ما دامي أشغلت عدواني وعذالي

عدوي أقرب قريب وعجز ياصلني

وعذولي أبعد من المريخ عن بالي

وصدّيت عن جادلٍ كانت تغازلني

أيام ماني شحيحٍ غير بوصالي

على بريدي وجوالي تراسلني

يا لين قفّلت صندوقي وجوالي

واليوم ما ادري على ماذا تجاهلني

الحمد لله ما هي غاية آمالي

لقيت عنها البديل اللي يكمّلني

وأنا أتمنى لها تلقى مية والي

آدم بذرّيته ما هو موكّلني

أروح من وين ما أبغى طيّبٍ فالي

** **

- نادر العماني