يالله يا ربي عليك التساهيل

أنت الذي عند الصعيبات حلاّل

أسألك تهدينا على خير ماقيل

وتجعل لنا في منزل العز منزال

وصبرٍ على نحور الليالي المقابيل

اللي تبتّ حبال وتطوّل حبال

ياما تحملنا الشقى والغرابيل

وياما تجرّعنا من المر فنجال

والفرجه اللي للذيابه مداهيل

ياما سهجناها بالاقفا والإقبال

وأنته يا هرّاج القفى بارد الحيل

ما غير من بين الغنادير تختال

همّاز لمّازٍ وجبان وبخيل

وتدق في سمعة زحازيح الأبطال

تمسّح كفوفك ببيض المناديل

لو كان ما حاشت من الطيب مثقال

وكفوفنا دايم مطرها هماليل

على الجماعه والأرامل والأطفال

وان كان عشّاق المراجل مهابيل

فلا تدوّر في المطانيخ عقّال

هذا الصحيح ووقفنّ الأقاويل

وراحت علوم خفاف وعلومٍ ثقال

يحوص عنها اباالحصين أزهر الذيل

ويبين لوجيه الرياجيل رجّال

صميدعٍ كنّه على شاطي النيل

قلبه غني والله عليمٍ بالأحوال

يومٍ العرب قامت تعد المحاصيل

كلٍ يفاخر في رصيده من المال

هذا يحط من الدنانير ويشيل

وهذا مغير يلقّح ريال بريال

أنا رصيدي متعب الظمّر الخيل

لا هو بلا ثروة ولا رفقة أنذال

كسبت في الدنيا معرفة رياجيل

وحطّيت لي بصمة على بيض الأفعال

أقصى نظر عيني ورى الجدي وسهيل

وأدنى نظر عيني على نايف الجال

** **

- سلطان الهاجري