الموضوعات الأكثر
الصدر ضايق وانت ضيقت صدري
وانا معك من غير وجهة وتحديد
يا كثر ما تجرحني ويزيد صبري
كنك تقول ازيد واقول لك زيد
تقول يا عمري واقول انت عمري
كني وراك اسمع وش تقول واعيد
احيان اسولف فيك واحيان اهذري
كني اسوي للأحاسيس تجديد
ما راح تلقى صدق واحساس كثري
وان كان ما انت مصدق اعطيك تأكيد
غنيت لك يا اللي على البال تطري
وانا من يدين الصبر للمواعيد
ورجعت اغني فيك ما عاد بدري
لو وقفت دونك سلوم وتقاليد
اشفق على صوتك مع الليل واسري
حتى وانا جالس بوسط الأجاويد
يا صاحبي غزيتني غزو فكري
واصبحت تحكمني وانا مقدر احيد
مو بس احبك إلا سلمتك امري
ناقص تجي وتحط بيديني القيد
صرت اتمنى بس بعجبك شعري
حتى لو انه ما عجب زيد وعبيد
من وين أببدأ فيك والوصف يغري
نور الليالي واحتفالية العيد
تلعب دلع وانت الدلع فيك فطري
اي والله العب فيهم وكيدهم كيد
عندك خبر صوتك رومنسي وسحري
واحساسك اصلي ما معك شي تقليد
وزينك على بعضه مميز وحصري
إعجاز بس إعجاز من غير تعقيد
شعرك وإلا عيونك أو عاد تدري
ما ودي افتح عيون المقاريد
تقبل إحساسي وحبي وشكري
حتى لو إني ما قطفت العناقيد
وسلم على قلبك ترى الحب عذري
ودوبك على قلبي فدتك التناهيد
أما تشوف لوضعنا حل جذري
وإلا بلاش نحب ونزيد ونعيد
** **
- عطاالله فرحان