يا برق ياللي رفيفك بوح وهروج

بأطراف غيمٍ سرى به طول ليله

نوضك يشق الظلام ويطوي فجوج

ويبل كبد السنين اللي محيله

عالي ولك في سماك أحلام وبروج

غالي ولك فالعيون أكبر قبيله

ساري وكنّك من الأيام مزعوج

يشكي لك الليل هم وتشتكي له

بوحك أحسّه بقلبٍ من ورى العوج

ومدلّهٍ كل شوفي يوم أخيله

لقيت ضحكي ودمعي فيك ممزوج

وخايلت فيك الدروب المستحيله

البارحه معك قلبٍ كنّه الموج

يصفق حنايا الضلوع اللّي تشيله

نقّضت جرح الزمان وحب عمهوج

وبيّحت سدّي وانا راعي طويله

مالي على اللي مضى غايات وسروج

انكفت يوم أنكف اللي غاب خيله

من لاشلع ضرسه اللّي صار ملجوج

ماارتاح لو شدّ طول العمر حيله

يابرق لون الشفق بيّن كما الموج

بشفاه بنتٍ مواريها جميله

لو طوّل البوح ذوّب بالحشا ثلوج

وحرّك نسيم الهوى غصن الخميله

تصبح على خير واللي ضاق مفروج

خلّك مع الغيم سبّار ودليله

** **

- زعل الرشيدي