الموضوعات الأكثر
سلمت يا راسٍ تخاضع له الروس
راسٍ رفيعٍ في حياته وعالي
إليا انتهض يدوس صعب الخطر دوس
ياطا على صم الصفا ما يبالي
حتى يحقق كل عزه وناموس
لهل الوطن في كل خير ومجالي
هو خادم البيتين والأمن محروس
للشعب والوافد وسيع الظلالي
وإليا بدا فالحال روحات وإدروس
يصنع قراراتٍ تفض الجدالي
مقدام ومجرب ينوس الوضع نوس
ثابت وراسي مثل صم الجبالي
أو لا صار فا المنهاج شكات وهجوس
يبوج صعبات الدروب الخوالي
ويعدل المايل لا جاه معكوس
ويضرب طريق المصطفى والعدالي
ويفهم خفايا العلم لو كان مدسوس
ويعرف حرام المشتبه والحلالي
ويذري إليا هبت هبوب الهوا كوس
وإليا ارتكى يشيل كل الثقالي
ويبلل إكبودٍ من اللاهب إيبوس
وتشرب من الصافي قراحٍ زلالي
أبو فهد يقوس واف الأمر قوس
سلمان لا منه بدا الحال حالي
الحاكم العادل ويبهج إله نفوس
إيقيّس الواقع ويرفى الخمالي
العفو من نهجه إليا جاه محسوس
يروح وإحساسه من الهم خالي
يا الله عسى الصحة على جسمه إلبوس
ويمد في عمره سنينٍ طوالي
واجز له الحسنات يا فرد قدوس
يا الواحد العالي عزيز الجلالي
طهور يا يمناً تروس العدل روس
عند الحقوق العادلة ما تمالي
نهج الحكم بالعدل ثابت ومسيوس
على المحجة ما تهزهز ومالي
معزي رسم نهجه بلا شك وطقوس
وتسلم الراية زحول الرجالي
** **
- مطلق بن فيحان الصوينع