يا صاحبي جر اللحن بالمواويل

ولا تجيب لزايد الهم سيره

خذ من ثبات طويق للراس توكيل

ثابت ولو دارت به المستديره

وعط مغريات الوقت للنفس تأجيل

حتى ولو شرهة زمانك كبيره

ولا يدري بسدّك من الناس دعبيل

والله إن يجيب الأوله والأخيره

تلقى العوض فيما مضى بالمقابيل

مايندم القناّص لاهد طيره

وان خابت الهقوه ولا في يدك حيل

إزبن على الله ثم حث المسيره

الرجل لامن صار منصى حلاحيل

لايشكي سلاحه نفاد الذخيره

مالله خلق فعيون خلقه درابيل

يدوّرون البيّنه .. والستيره

من حط وجهه عرضةٍ للغرابيل

تلاوحوه أهل اليدين القصيره

الناس لو تملك حجر طير أبابيل

في ساقت المسلم تشن المغيره

والرأي للّي مايطيعه حطب ليل

ماينفع الشاير ولا مستشيره

وأنا ماأقول إنّي منزّه من الميل

أخطي ولكن عين ذاتي بصيره

اللي نقل رسالة الوحي جبريل

واللي تلقّاها نظيف السريره

لقى من العالم عداوه وتنكيل

عداوةٍ مامرّت إنسان غيره

** **

- راكان بن بدن