يا حبيبٍ تمكّن وسط قلبي هواه

كل يومٍ يزيد وكل ليله يزيد

راسيٍ وسط قلبي مثل ضلع السراه

لو تبيد السراه وضلعها مايبيد

كل دارٍ يجيبه غاليٍ من غلاه

وكل حيٍ يعزّه في ضميري مجيد

كل عرقٍ بقلبي بالموده سقاه

ليل عانق طويل الزرع خضر الجريد

كل زينٍ نشوفه مايجي مستواه

مثل بدرٍ تعلّا في مناله بعيد

كل دربٍ يمرّه نوّره من بهاه

سايدٍ بالجمال وللغنادير سيد

نور بدرٍ تجلاّ واكتمل في سماه

كل نجمٍ يشوفه يختفي من جديد

عنق ظبيٍ تلفّت بين روض وفلاه

نور صبحٍ تجلاّ بين خدٍ وجيد

الله اللّي عطاه وكمّله في حلاه

الله اللّي عطاه من الجمال المزيد

أسعد الله صباحه وأسعد الله مساه

والليالي معاكم كلها يوم عيد

** **

- حشر بن عبدالمحسن بن حميد