يا منتهى الشرهه تجيك المشاريه

النفس لاجرحت يبيّن زعلها

الشعر زعلته وجت لك معانيه

وإن طافتك هذي تحرّى بدلها

لو جيت أدوّر لك عذر وين الآقيه

تجاهلك حتى عذاري قتلها

أنا أعرفك لو ينشرى الطيب تشريه

لكن حسافه ليت غيرك فعلها

إن كان في نفسك كلامٍ مخفّيه

الكلمه اللي تحرج النفس قلها

ماهوب أنا اللي خمس كلمات ترضيه

النفس بالصاحب تقاس بعملها

بعض الأوادم ضحكة الزيف تغريه

لين يتجرّع سمّها في عسلها

واللي عن الواجب طواريه تعميه

تمر ميلات الخطأ ماعَدلها

واللي عيونه تنخدع في مباريه

لو كلمته عوجا عشانه قبلها

واللي نسى يعرف عدوه ومغليه

نفسه تساوت علمها مع جهلها

هذاك ياكود القصيده توعّيه

حتى يعرف إن المشاعر خذلها

من صد عنّي عمد والله ماأرجيه

لو حاجتي عنده حشى لااعتزلها

أنا من اللي عزّة النفس تغنيه

ماأذل نفسي للحياه وغزلها

وأنا من اللي حاضره مثل ماضيه

لاكبرت القاله تعوّد لأهلها

كلٍ تحثّه للمعالي هقاويه

بس الثقيله مالها إلاّ جملها

الصاحب الطيّب على الروح أبدّيه

والا الثعاله تنكشف من حيلها

** **

- عبيد الأزمع أبوثنين