الشعر ماني مقترح دستوره

ولاني وكيل آدم على مذخوره

ولكن من شيٍ يحز بنفسي

هاضت به أفكاري وهي مجبورة

شعر النبط شفته بوسط الشارع

يمشي ويسحب رجله المكسورة

وما شاهدت عيني عرفت أسبابه

زان الزمان وبانت المصرورة

الشعر سارت هيبته ماطيه

تشاوتوه الربع مثل الكورة

يشوته الفارس وجاه الحارس

ينقز على رجله ويلطم زوره

وأهدافهم يا للأسف مكشوفة

اغراض شخصية وصوت وصورة

يستخدمون الشعر لا بسط حاجة

وش هالبشر منهيةٍ مأمورة

إما هذم رَجلٍ بدون مبرر

او يمدحه مدحٍ يمس شعوره

مدحه بوجهه يعتبر مسبة

إن كان يعرف مستواه ودوره

ولا تهيض عمنا متغزل

واعطى الجهاز الحر من ميسوره

يصف بنات الناس وصفٍ خاطي

وداوم بحلقٍ كنه الماصورة

ثم قال أنا شاعر وجاك محدر

يعدّ حاله ناجحٍ من دوره

هو ما درى أن الشعر مظلومٍ به

وإنه بشر وصحته محظورة

يا من ظلمت الشعر خاف من الله

خله يعيش وحالته مستورة

يا الربع كلمة شعر تبغى شاعر

مثل السديري يوم غاص بحوره

وابن ربيعه والخلاوي راشد

ولا عبيد العلي يوم عصوره

ومثل القضاة ومحسن الهزاني

وابن شريم اليا رفع باكوره

وابن حميد وشالح القحطاني

ولاهي عن أهل المعرفه مقصوره

ولاني مجامل مع هذا والثاني

اعدّ شعار النبط وابحوره

واللي ما هو قنعان ينشد عني

يزورني للبحث ولا أزوره

وعند اللقا كلٍ يجرب حظه

ولاني وكيل آدم على مذخوره

** **

- رشيد الزلامي