الموضوعات الأكثر
الوجه الحسن
يا حلا صبحٍ حجب شمسه ركام خياله
هو صباح النور صدق الله يخلي نوره
فيه باردة النسايم لابدت مختاله
حرّكت غصنٍ شدا بأحلى الغناء عصفوره
يا عسى يبطي ضياه ولا يشد رحاله
أو يقفّي والديار المجدبه ممطوره
لين من يهوى الجمال يطيّب الله فاله
وإن طراله شعر عز الله يفيض شعوره
وإن نظر فالماء والخضره وروّق باله
باقي الوجه الحسن ويكمّل أجمل صوره
وجه مملوحٍ يتوق القلب لأجل وصاله
الهنا والسعد كله في مشاهد حوره
وخدرة عيونه وخثرة نبرته وجفاله
وابتسامة شفته ونعاسته وغروره
كلها عندي حلا الدنيا بكل أشكاله
وكلٍ يوصّف حلا دنياه من منظوره
وفي عيوني لابدا الفاتن وهل هلاله
وانبلج نوره وفاحت فالدروب عطوره
قمت أمتِّع ناظري في روعة الإطلاله
والنواظر لو تكذّب ما ترى معذوره
ولا تحدثنا وكلٍ زاد ملح أقواله
قمت أعجل في كلامي لجل يبدا دوره
ولا حكا واخجله شوفي زاد باستعجاله
وضيّع وخالط كلامه بسمةٍ مكسوره
فالخفوق منزّله ومجملٍ منزاله
والله ليبقى ولا يبدا نهار ظهوره
ويوم شفت الماء والخضره ذكرت وصاله
وقمت أخيله فوق وانظر فالسحاب نذوره
* * *
عديل الروح
ياللي زهيت الماس بالجيد والشال
لا تحسب إن الماس زادك جماله
الماس ما شفته بعقدٍ وسلسال
الماس من خدّك يزيد اشتعاله
والصبح ماشفته على روس الاقذال
الصبح من وجهك يبين انفعاله
وانت القمر مسراك يشرح لي البال
بدرٍ يشوق العين ليلة كماله
والبرق ماشفته على مقدم اخيال
البرق بقدومك يزيد اجتواله
شوفك وصوتك مثل همال همّال
مزنٍ قراحٍ غيث قلبي زلاله
وانته عديل الروح ماهوب الاموال
والاّ تفوق الروح في كل حاله
ما غيركم بالقلب يذكر وينقال
أنت الوحيد اللِّي بقلبي لحاله
بنيت لك فالقلب ملكٍ ومنزال
ملكٍ على غيرك صعيب مناله
من طاولك بالزين يا زين ما طال
ما طال زولٍ بالجمال اكتماله
يا ماضي سنيني ويا عمري الغال
يحفظك ربي في نهار ولياله