لا صرت ما انتب مهتني في حياتك

ودايم وصدرك يشتكي ضيقة البال

راجع حساباتك وراقب صلاتك

أكيد تلقى فيه تفريط وإهمال

زاحم ذنوبك في جيوش احسناتك

تكسب رضا ربك وضيقتك تنزال

ولا هوب شرط تطول كل أمنياتك

ما دمت في صحة ومستور الأحوال

لا تندم بعمرك على شيء فاتك

دامك عن الدنيا مفارق ورحّال

ومع والدينك لا يطوّل سكاتك

لو كنت ما انتب خابرٍ شيء ينقال

حَدّثهم ولا تفتح محادثاتك

وإن سولفوا لا تشغلك بعض الأشغال

لا حق على تويترك وسناب شاتك

احذر تقارن والدينك بجوال

عبِّر لهم قبل تهل اعبراتك

على الفراق اللي ما أحد فيه يحتال

صر عز لإخوانك وعزوة خواتك

في هالزمان اللي كثروا فيه الأنذال

اختك اليا من طاب صيتك وذاتك

تشعر بأمان ولو هي ببيت رجَّال

ومع القرايب لا تدوّر جزاتك

خصوصاًَ مواصلك للعم والخال

والكلمة اللّي من ولد عم جاتك

حاول تجاهلها ولو قال ما قال

احذر تهجره ثم يسوّي سواتك

ويلقى عليكم راعي الحقد مدخال

وعلى صديقك خفّف ملاحظاتك

ما فيه من بين البشر كامل خصال

كن للخوي مثل الشجر في ثباتك

إمَّا لقى عندك ثمر حصّل اظلال

وماكل رجلٍ يستحق التفاتك

بتشوف دامك عايش ألوان وأشكال

رجلٍ بطيحاتك يسد اعثراتك

ورجلٍ يبيعك كل ما طحت بريال

ورجلٍ برأيه يأخذك من شتاتك

رأيه سديد ومنطق منطق ارجال

ورجلٍ يحوص إن قلت عطني وصاتك

ما كل رجلٍ ينشكى عنده الحال

ورجلٍ يعزّز لك من أربع جهاتك

ورجلٍ يضيق ليا مدحك منصف أفعال

يضحك وهو أشر لك من عداتك

غيرة مَرَة لو يلبس شماغ وعقال

إن كان ربي مد لك في حياتك

بتشوف دامك عايش ألوان وأشكال

** **

- سلطان بن بندر بن بتلاء