ذَا زمانٍ غريب وَذَا زمانٍ عنيد

طيّر النوم عن عيني وعفت المنام

كل ما قلت زانت بان همٍ جديد

وكل ما جيت ابا امشي صار دربي ظلام

وكل ما جيت أكف الدمع دلّى يزيد

وانتثر فوق خدي مثل وبل الغمام

كم تحملت أنا شَيْ ٍ يفل الحديد

أتعب القلب قبل الروح ثم العظام

وكم تغاضيت عن شَيٍْ بحقي وكيد

ودي اجلس بهدنة لين ياتي السلام

ودي أحدٍ يساعدني ورايه سديد

لا نخيته فزع.. ما هو مجرد كلام

لا يماطل ولا يقعد يزيد ويعيد

وان تكلم كلامه مثل ضرب السهام

ما تفيد الحسايف بعد قطع الوريد

وما يفيد التندم والجفا والخصام

ما عرفنا من الخاسر من المستفيد

لكن أحوالنا والله ما هي تمام

ودي الجهد يطلع منه شَيٍْ مفيد

كل شَيٍّ غدى قدام عيني حطام

ودي إن المغثة عنّ تبعد بعيد

أرتجي واحدٍ ماهيب عينه تنام

لكن أرجيك ياربٍ علينا شهيد

تفرجه ياولي الكون قبل العدام

** **

العامرية (أم محمد) - الرس