كثر التمدح بالمجالس فشيلة

ولا بالمعايا للمسافير طايل

دام العميل يفرِّقه عن عميله

ويورث الاضغان بين الحمايل

ويفرّح العدوان واهل الغليلة

اللي علينا ينصبون الحبايل

ومن كان ماله من يمينه حصيله

مايرفع المعثور مدح الاوايل

واخير من محزم شيوخ وقبيلة

تعلقوا بالله رب القبايل

لو قيل ربعي يحتمون الدبيلة

الحامي الله من عظيم الهوايل

قد كانت الوحدة شبه مستحيلة

وبالدين حققها وحدب الصقايل

عبدالعزيز اللي شملنا جميله

مذلل كبار الصعاب الثقايل

وطاعة ولاة الأمر حق وفضيلة

آل السعود معدلة كل مايل

والحمدلله بالعطايا الجزيلة

مليكنا سلمان مشفي الغلايل

ومحمد الريبال زنده وسيله

ما احدٍ يدوِّر بالاسود البدايل

الدين واحد والوطن ننتمي له

والصف واحد في نحر كل عايل

والعبد ما يملك من أمره فتيله

ولايمنع المقسوم كثر التحايل

الله ولا غيره ولا احدٍ مثيله

ما ابدِّل المعبود في عبد زايل

اللي ليا ضاقت على الناس حيلة

كلٍٍّ رجع له خاضعٍ له وسايل

استغفره واعظّمه والتجي له

وارجيه عفوه قبل ركز النصايل

** **

- فيصل بن محمد العطيشان