إن كنت كذبه في حياتي أنا أبغيك

لو كان كذبك في عيوني حقيقه

وين التفت بالكون ماثل الاقيك

عين المحب أحيان ترسم طريقه

أشوف دربي من ضياء نور عينيك

تكفى حبيبي لا تغمّض دقيقه

أعاهدك يا سر عمري أراعيك

رغم المسافه والظروف المعيقه

ورغم الذي بيكون وأحداث ماضيك

أبقى أنا الحاضر وأبقى الرفيقه

ودعوة لساني يا عسى الرب يبليك

يردّها قلبٍ شفع لك شهيقه

وإن جيت بأجافيك والاَّ أخلّيك

أحس في صدري من الهم ضيقه

أخطي وأسامح واعتذر لك وأراضيك

لأن كذبك في عيوني حقيقه

** **

- نجاح المساعيد