ألا يا مطوّل الغيبه وش اللّي بخاطرك تخفيه

أنا ملّيت من شوفة يدين العشق مكتوفه

تعال وهات ما عندك وعطني العلم من تاليه

ترى صبري قصر عمره بعد ما طوّل وقوفه

غيابك كان ما تدري عن اللّي فيني مسوِّيه

تعال أعطيك من لحن المواجع كم معزوفه

جمالك كل ما سولف فناجيل الغلا تقهويه

من دلالٍ على رف الشعور العذب مرصوفه

يحبك وأنت لا تسأل يحبك كيف والاَّ ليه

فؤادٍ كانك أرخصته ما أبي تطبطب على كتوفه

أحس الناس من دونك يمرّوني بدون وجيه

ليال العمر من بعدك تمر ولا بها حسوفه

تعال وأنت من بدر المحاسن يضوي بخدّيه

ترى مال الكحل قيمه وعين الحب مطروفه

إذا قلبك فقد معنى حنان الود ما يعطيه

إذا ما هو يعيشه صدق ما أبي تضرب على دفوفه

أنا ما أبغاك تسألني عن الخاطر وش اللي فيه

تعال وقلي بربك وش اللي عينك تشوفه

تعال الحق على قلب يجيه الطعن من غاليه

إذا كانك سبب موته وداعا يا أجمل ضيوفه

** **

- صالح محمد العنزي