شيءٍّ بصدري لي زمانٍ مْخبِّيه

ودِّي أقوله بس وشلون أقوله؟

أخاف لا جيت أتكلَّم وأبدِّيه

يفهم على مفهوم ماهو بحوله

أبطيت ساكت والصدر فيه مافيه

وقصرت عن شيءٍّ تمنيت أطوله

أقفيت عن حلمٍ قضى عمري أرجيه

في موقفٍ فيه الهزيمة بطوله

تدفعني أوجاعي على شيء مابيه

ويردّني عزاً تصاهل خيوله

من همّله وقت الجفا في مضاميه

يشوم عنّه لو تفيّض سيوله

راعي المبادي مايخلّي مباديه

لاقال ما خالف بقوله فعوله

عزِّي لقلبي من تهاوي هقاويه

الله يجيره عقب جارت حموله

من هول ما جاه الزمان ببلاويه

ماعاد به بلوى تمرّه تهوله

كم ضاق ماقالوا له الناس وشفيه

ياليتهم شافوا مراحل ذبوله

حتى غدت حاله تضايق معاديه

وأبطى وله بالحزن صوله وجوله

صبح الأمل في كل يوم متحرّيه

ما مر يوم إلا أتحرَّا وصوله

لعل حلم العمر يشرق بتاليه

واللي صبر يظفر بخيراً ينوله

واسلى وأبدِّي خافي الصدر وأحكيه

لا طلت شيءٍّ قد تمنيت أطوله

** **

- مرزوق الروقي