على اولك يا سيد التعب والتعب سجَّان

مفاريد غر النور في الحلق منزرَّه

مقادير ياللي لو تثيقلت شاثك شان

عطاشا هدب لاهان منك اشقر الغرّه

عيونك سفر في طرفةٍ مالها عنوان

خذت جملة السبع العجايب لها قرّه

سنينك ترف وانا سنيني بقايا إنسان

رمت بي مقادير الليالي على الجرّه

يابو قد يانع ما ذوى الوقت غصن البان

تبرّد به أنسام امنياته وتحترّه

تفاصيل ذكرى الغالي اللي مع الأزمان

تبيحه وتتمنى وصاله ولو مرّه

لمع والسراب اليا لمع في فم العطشان

تقوده له الآمال والطمعه أتجرّه

وأنا فيك لافكرت فالشعر والأوزان

تفتَّق درابيل الخيالات بالمرّه

درابيل قايد فيلقن يبرح الميدان

يبي ينتصر للقدس ومحمد الدرّه

صحيح انكسرت بعين جابر ولد حيّان

ولولا انكساري ما اكتشف عالم الذرّه

بسيطٍ صنع تاريخ قلب وترف وجدان

صغيبٍ ترك كل من امنياته لمن غرّه

أناديك وأنته رحت خيطٍ من الدخان

وانا مالي إلا اندهك وأعاود الكرّه

تثيقل وانا ما ابخسك حقك من النسيان

ولن ما ذكرتك جابتك نبضةٍ حرّه

هذا والمسافر راح يا وردة الركبان

على جرّته بيض الطموحات منثرّه

بعد ما ابرهزَّت غربته في سماه وبان

لعينه عيون الدار والجار محمرّه

رحل والمسافه فم ثعل والطريق السان

تردّد وراه احلام دنياه وتبرّه

أنا أول حكاية فوق ما كان بالامكان

وانا آخر مسافر راح ما أحدٍ عرف سرّه

** **

- عبد الله بن حديجان