الموضوعات الأكثر
ناح الحمام وبيّح القلب مكتوم
ما حن في خافي الحشا المستهامي
ما ادري طرب يالورق أو صرت محروم
أو بك على فرقا وليفك هيامي
يالورق ما يخفى على الله معلوم
لو هو خفيٍ عن جميع الآنامي
يالورق ما صابتك الايام بسهوم
مثلي ولا انت بمغرمٍ في غرامي
حتى تنوح وترفع النوح واتهوم
تبدي شكايا مبهمات الفهامي
خل النياحه للذي بات مهموم
مثلي يجاوب ساجعات الحمامي
والا إنت يا ورقٍ على راس مزموم
ما نحت نوح امعقّلاتٍ ظوامي
مستانسٍ في بارد الظل وتحوم
تشهرف وتشرف عاليات العدامي
ما صادفك صرف النيا عاد بكلوم
ولا ذقت ليعات الهوى والمرامي
انا كثير النوح يالورق والوم
من لا ينوح ومعتني في ملامي
مجروح قلبي داه وادواه مفهوم
مخفيه عن نقَّال سدّي وكامي
يالورق من صابت لياليك ملزوم
يجفا نظر عينه لذيذ المنامي
بالله خذ عني مراسيل وارقوم
مختومةٍ في طيّها لي سلامي
عد النبات وعد ما خط مرسوم
واعداد ماهل المطر من غمامي
وعد ما يطلب من الله مظلوم
وعد ما باولاد حامٍ وسامي
بتحيةٍ من صافي الود معدوم
منه الصبر كنّه فقيد العمامي
ابديه بالترحيب وبالشوق مختوم
ختم الغوالي غاليات المسامي
للجادل اللي جاد لي منه مفهوم
رد الخبر عنّه بليَّا وهامي
** **
محمد العبد الله القاضي - رحمه الله -