كثر ما حن صدري للونيس وكثر ما درهمت

فجر صدري حنيني وأتعب الأقدام درهامي

عيون الصد وعيون التجافي حُول مهما أكرمت

تشوف المجتهد كسلان والبنَّاي هدامي

مصيبه لا تردّت قيمتك في عين من قيّمت

يشوفك بالسهل وأنته تشوفه بالسماء السامي

ما دام أن جانبي شام لجنابك وانت عين شمت

كثر خيرك وانا مانيب لا جايع ولا ضامي

أشوف إنه علي واجب ليا مريتكم سَلَّمت

مرور اكرام تربطها الكرامه عند الاكرامي

على شان الخفوق اللِّي على عرشه قعدت وقمت

وحجب عنك الدجالين أشرقت لك بيض الايامي

ختام السالفه يا طيب العشرة كرمت ودمت

ها حقك علي وحق هقواتي على أوهامي

مصير الوقت يشرح لك دروسه لو غفلت ونمت

يصحيك الزمان اللي يصحي كل من نامي

** **

سعد بن جدلان -رحمه الله-