الموضوعات الأكثر
الصوت
أحدٍ تحبه قبل عينك تشوفه
واحدٍ الى شفته تمنيت فرقاه
واحدٍ على فقده تجيك الحسوفة
واحدٍ بفقده راحة القلب وادواه
واحدٍ يسرك بالمواقف وقوفه
واحدٍ بحزات الرخا ما تمناه
واحدٍ على شانك يكيّف ظروفه
واحدٍ يبي ظرفك إلى شان يلقاه
واحدٍ نقش حبك بواضح حروفه
واحدٍ كتب ودك وبالكره يمحاه
واحدٍ يبادلك الغلا والمروفة
واحدٍ على شان المصالح نواياه
واحدٍ امانك بين امانه وخوفه
واحدٍ ولو تامن تحذْره وتخشاه
واحدٍ بكسب الطيب نفسه شغوفة
واحدٍ محله بالردا ما تعداه
واحدٍ به الشيمة ونفسه عيوفة
واحدٍ نسى درب الكرامة وخلاه
واحدٍ معه نفسٍ سليمة عطوفة
واحدٍ قست نفسه وبالخبث ممشاه
واحدٍ بقت بيض النوايا وصوفه
واحدٍ غدت سود النوايا مطاياه
سليمان بن حمد العليان - عنيزة
* * *
الصدى
من عاش بالدنيا وخذ له بروفة
تعطيه درس يندفن ماتناساه
مادام راسه ينقلنه كتوفه
لازم يحفظ الدرس ويحسّب خطاه
.يا ابو حمد كل الدروب معروفة
ومن زان له رجمٍ تحيزم و عداه
احدٍ من المعروف تندا كفوفه
والناس تفرح كل ماحل طرياه
دايم مواقيف الظفر ماتطوفه
وكم من عليلٍ من عنا الوقت داواه
مثل السحاب اللي تشوّق قنوفه
ودك تقبل راس مثله وشرواه
واحد لفعل العيب نفسه تلوفه
يشوف درب العيب واضح وياطاه
اللي على الصاحب يجرد سيوفه
يخفي معاريفه ويظهر خطاياه
تصدق معه وتعامله بالمروفة
وتمد له يمناك ويمد يسراه
هذاك لا من راح جعله ذلوفة
يالله عساها روحة مقيط ورشاه
تجاهله ياجعل بقعا تحوفه
ابعد عن الناقص وجنب نحاياه
عبد الرحمن العريفي - القويعية