بسم الله أبدا وأبتدى وآنقّي خيار القصيد

وإسم الله أعظم مابدوا فيه البشر خير الكلام

أستغفره وآتوب له وأخشاه وآردد وأعيد

يا رب أنا من دون مدّاتك أضيع مع الزحام

ألهمني الكلم الحسن هاليوم عندي يوم عيد

عيدٍ يتوّج حرفي المتواضع بأعلى وسام

يالجوف ما مثلك عروس اليوم هندامك جديد

جاك الملك سلمان إبن عبدالعزيز إبن الإمام

رشي عليه الورد ولاّ جاوبي صوت النشيد

اللي سجع فيه الشعر فرحة وجاوبه الحمام

ياالمملكة أعظم ملوك الأرض صاروا لك رصيد

من يوم جوك أخوان نوره ماغشى نورك ظلام

لو غاب أسد يلفي أسد متمكّن وباسه شديد

يحمي حماها لين تصبح دارنا أمن وسلام

من غيبة معزّي وحتى غيبة الصقر الفريد

عبدالله الشهم الكريم الفارس السيف الهُمام

وإنتي على راس الفخر عزّة وتاريخٍ مجيد

دستورك القران والسنّة وعينك ماتنام

واليوم صرتي في يدين اللي على غيره يزيد

سلمان له بيعة ولاء حسب الشريعة والنظام

يا مرحبا يا خادم البيتين يالعيد السعيد

ترحيبةٍ تملا صدور أهل المحبة والغرام

ياسيّدي واللي خلق هالكون حبّك بالوريد

شعبّك يحب القائد اللي مايعرف الإنهزام

جتك الوفود تبايعك واللي يبايع ما يحيد

عهدٍ علينا نوفي البيعة ونعطيها إحترام

قدت المسيرة في رحاب العزّ والمجد التليد

وعلّق عليك الشعب آماله وتحقيق المرام

قائد بطل كم مرّةٍ نوّخت شيطانٍ مريد

تليته من رقبته وحطيت في خشمه خزام

الله عطاك السطوة اللي ما يعاندها عنيد

والله عطاك الجزلة اللي ما يطاولها سنام

حنكة ونظرة ثاقبة وإدراك مع رأيٍ سديد

حزمك وعزمك حكمتك عدلك به الحق إستقام

سيفٍ بوجه أعداك يوم إن العدا قامت تكيد

تضرب بكفٍ من حديد إن صار بالوضع إنقسام

وإن شحّت سنين العطا كنّك تبشّر بالحصيد

تعطي بلا حد ويديك أندى من كفوف الغمام

بأوّل خميس من إعتلاء العرش لك برق ورعيد

غرّق وطنّا بالمكارم وأكرم الشعب الكِرام

خاشع لربّك قاريء القرآن تعلم ما تريد

ما تمشي الخطوة ورا ممشاك دايم للأمام

تعصف بحزم وتدّخر للمعضلة عزم يبيد شديد

وإن قامت الهيجا لك رجالً يقصّون العظام

يجلس على يمناك سبعٍ لازئر فكّ الحديد

ولي عهدك لاتولاّ الكايدة صارت سلام

كل ما عطيته كايدة يقول لك هل من مزيد؟!

زدني وأنا يا سيّدي دون الوطن مثل الحُسام

إسمه زرع بقلوبهم إرهاب من نوعٍ جديد

متأثّرٍ بآبوه وجدّه لا يضيق ولا يضام

مْهندس الرؤية قوي العزم كلاً به يشيد

إسمه رسخ في صفحة التاريخ والتاريخ هامْ

هذا حفيد مؤسس الأمجاد ونعم الحفيد

متجلّية فيه القيادة من بعد سنّ الفطام

من شاف أبو سلمان في هالوقت كنّه يستعيد

صورة معزي بالشكل، والفعل مثله بالتمام

واللي حصل بالعاصفة ينبيك بالعلم الأكيد

يوم العمايم ولّعت دخان من كفّ الغلام

اللي يقرب من حدود المملكة ما هو سعيد

والله فلا يهنا عدو ديارنا فيها بمقام

إلاّ يخلّي جثته عبره لمن عقله بليد

اللي ترك نور الهُدى وإنقاد لدروب الظلام

واللي يفجّر نفسه بنفسه ترا ماهو شهيد

لا والله إلاّ مختلف عقليّاً وفيه إنفصام

يا سيّدي وإنت تعرف في هالأمر من مستفيد؟!

غير الروافض ناقصين العقل عدوان السلام

الله يلم الشمل من صنعاء لبغداد الرشيد

وترجع سيوف معاوية للشام وتقود الخطام

وفي ليبيا يرجع لنا المختار بسيوف الوليد

ويرجع لأمتنا زمانٍ كانوا رجاله عِظام

يا قائد الأمّة عسى عمرك على الطاعة مديد

حنّا إلى دقّت طبول الحرب شدّينا الحزام

إضرب بنا الكايد ندك الأرض بيدٍ فوق بيد

أرواحنا من دون حد الدار لايمكن تسام

دون الوطن لا يمكن نحايد ولا يمكن نحيد

يبشر بنا بالوقفة اللي تقلب الدنيا عسام

والفتنة اللي ريحها من شرق ما هزّت جريد

وش عاد بجبال السراة وكعبة البيت الحرام

الجار لامن جار صار الصمت له ما هو مفيد

يا وسع صدر المملكة متحمّلة عشرين عام

إلا الأمن في دولة التوحيد يالقُطر الوحيد

تستاهل اللي جاك واللي ودّه يجيك بهدام

بدري عليك تغيّر التاريخ مع ساعي بريد

ما تدري ان المملكة والشعب من خلف الإمام؟

خل الخيانة تنفعك خلك كذا تبقى طريد

معزول مثل اللي به الطاعون او عنده جذام

المجد يا خاوي من الأمجاد ما هو بالرصيد

المجد بالجيرة وفي صدق العهد والإلتزام

المجد عند السبع أخو نورة معه إيدٍ بإيد

سيف الحزم والعزم سلمان الفخر عالي المقام

ويا سيّدي سلمان حنّا تحت أمرك: والأكيد

إنّك وسم جيت ونبت بالجوف ريحان وخزام

بإسم البدر بدر السعد ترحيبنا لأجلك يزيد

أميرنا اللي به طموح الجوف عدّاه الغمام

وإبن الفهد عبدالعزيز النائب الفذ الفريد:

يا مرحبا يا خادم البيتين ياراس السنام

الله هو اللي يعلم الفرحة ويعلم ما نريد

والشاهد الله شوفتك بالجوف هي كل المرام

شاعر شمالي جاب له في سيّده شيخة قصيد

والشعر في سلمان ابن عبدالعزيز أغلى وسام

** **

- شعر/ متعب دهام النصار الشراري