أوقد بالارطى، واتقهوى من الكيف

والشاهي خادر خاثر اللون حالي

معي رجالٍ كل أبوهم على الكيف

ممشاي معهم يرفع الراس عالي

وقلوبنا.. بالوِد مثل المواليف

لجل الوناسه ما نعد الريالي

نونّس بعضنا بالقصص والسواليف

والجو هادي في خلا البيد خالي

عقب طلوع سهيل وموادع الصيف

والوسم قرّب وابشروا بالخيالي

برد الطبيعه مانبي برد تكييف

قصر نهار اليوم، والليل طالي

يالله من المنشا تسوق المقانيف

وسميةٍ تمطر جنوب وشمالي

تسقي الجذر والجذع والعسب والليف

وتطيب الأرض الجرد عقب المحالي

والبل مع وبّالها بالطواريف

ترعى ما بين حزومها والرمالي

وضحٍ تضالع بالخشوم المناكيف

مع الغياب وقبل وقت الزوالي

جولٍ من الكدري تقفّاه هدّيف

عراض المناكي والغوارب طوالي

أقرأ عليها من عيون الملاقيف

أخاف يصيبه من نظرهم جفالي

البل عطايا الله هوى مكرم الضيف

إذا انذكر تثني عليه الرجالي

له مجلسٍ عامر بروس المشاريف

ويقهوي ضيوفه بصفر الدلالي

متولّعٍ بالبل ما هي تصانيف

والبل راس المال أول وتالي

واختامها ما سجّلوا بالمظاريف

صلوا على محمد سراج الليالي

** **

- نايف العبيد