القلب ساحة حرب وجروحي قبور

دفنت فيها.. الذكريات وحنيني!

وسوّيت من صبري حوالينها سور

في داخله كل شيء.. بينك وبيني

لا تعتذر لي ما انت صادق ومعذور

خل العذر.. لِّلي بقى من سنيني!

لو كان عندك ذوق واحساس وشعور

ما تشتكي ذكراه.. قدام عيني

ليه اشتري خاطْرك خاطرك مكسور

من قبل.. لا اجيك وقبل لا تجيني

ما عاد للتقدير قيمه ولا دور

وشلون أقدّر وضع من لا يبيني؟!

من قلت لك تسلم حبيبي ومشكور

وسحبت من راحة يسارك يميني

وأنا نويت غياب ما بعده حضور

الله يغفر لي الجفا ويهديني

هذي طبيعة نفس ما تقبل الجور

ما هيب في يدينك ولا في يديني

ولا انت ما يلحق ردى نفسك قصور

شوف بعيونك ويش سوّيت فيني

بعد غيابي عنك حول أربع شهور

توك تجي تسأل علامي وويني؟!

قد قلت لك ماني على الوصل مجبور

لا غبت عنّك (يوم).. لا تحتريني!!

** **

- محمد جارالله السهلي