يالله عسى مزنٍ تلابد ركيمه

واضحى من القبله شواهيق وجبال

كن الجبال السمر فيها امقيمه

تمشي على هونٍ بواهيت واثقال

اللي من القاصي للقصى امهيمه

تفرض بهيبتها من الجال للجال

اللي عليها اعروق برقٍ صطيمه

يجعل سنا نوره من الليل مدهال

تسمع جلاجل بالرعد مستديمه

تانس مطرها ولابعد جاك همال

تمشي على يمّة اديارن كريمه

باطراف عرجا بين جمران والضال

وينزل من المولى ويحيي هشيمه

وتزهر مطاليع الوسم حيث ماسال

ويمشي على خضابٍ تدارى لطيمه

ويصب في سلعٍ على الشعب تنهال

ويدحم على جاله وتسمع زخيمه

سيلٍ يزين بمنظر الشعب لامال

وبيت الشعر مبني اجدادن قديمه

ومشرعٍ تيزاره ايمين وشمال

في مقدمه لهل القلوب السليمه

جلسة اشدادٍ مابها القيل ينقال

في منظرٍ مافيه شيٍ يضيمه

لاصار حمال المطر فوق خيال

يداعبه عشبٍ يذعذع نسيمه

يعج مع بنن على النار فدلال

في خايعٍ يلبس مع الريع ديمه

يزين مع شبة هل النار فنجال

ون هو تشوم بناظرك تستهيمه

في مشهدٍ مابين شادد ونزال

والله يديم الامن فوق العظيمه

دار السعود اللي لها القلب منزال

** **

- شعر/ عبدالله بن منيف الحبيل