يا غايبة والقلب عندك وديعة

مدري وش الله فيك سوى ولا فيه

طالت على الصابر سنين القطيعة

واحلى العمر غرب وقفت لياليه

وصلك سراب في متاهات قيعة

يلوح واليا قرب الضامي يتيه

ضاقت علي فجوج الارض الوسيعة

والفكر تاه اللي يقدي مواطيه

وحل الحزن فيّه محل الطبيعة

ما اشوف من حولي يسولف ولا اوحيه

مثل الذي فجأة جرت له فجيعة

على وحيدٍ غايب عنه يرجيه

اليا حبس دمعه عصى مايطيعه

اليا جاه من ربعه عزيز يعزيه

حزني مثل حزنه عجزت استطيعه

واليا حبست الدمع فجر مجازيه

كنه مطر ديم غزير جميعه

رش اوله يجي مثل رش تاليه

القلب من يهديه والا يبيعه

وشلون من صندوق صدري خطفتيه

كوني مثل ماكنتي اول مطيعة

والا علي بتالي العمر رديه

** **

- سعود عبدالله المبيريك الحربي